ភ្នំពេញ÷រយៈពេលពេញមួយឆ្នាំ២០២៤ កន្លងទៅនេះ លំហូរទុនវិនិយោគផ្ទាល់បរទេសមកកាន់កម្ពុជាមានទំហំ ៤,២ ប៊ីលានដុល្លារអាមេរិក(១ប៊ីលានស្មើនឹង១ ០០០លាន)ពោលគែកើន ៤,៩ភាគរយ ដោយសារការកើនឡើងនូវគម្រោងវិនិយោគមួយចំនួនលើវិស័យមិនមែនហិរញ្ញវត្ថុប្រមាណ ១៧,១ភាគរយ ខណៈការវិនិយោគលើវិស័យហិរញ្ញវត្ថុថយចុះ ៣៥,៥ភាគរយ។ នេះយោងតាមរបាយការណ៍របស់ធនាគារជាតិនៃកម្ពុជាបង្ហាញឱ្យដឹង។
ប្រភពដដែលបន្តថា ចំណែកវិនិយោគផ្សេងទៀត បានបង្ហាញពីការកើនឡើងទ្រព្យសកម្មបរទេសសុទ្ធ ៣,២ប៊ីលានដុល្លារ កើនឡើងប្រមាណ៩,៥ភាគរយ ធៀបនឹងឆ្នាំ២០២៣ ដែលបណ្តាលមកពីការកើនឡើងប្រាក់បញ្ញើ និងការវិនិយោគលើផលបត្រនៅក្រៅប្រទេស គួបផ្សំនឹងការកើនឡើងការទូទាត់បំណុលក្រៅប្រទេសនៃវិស័យហិរញ្ញវត្ថុ ស្របពេលដែលការខ្ចីសុទ្ធរបស់រាជរដ្ឋាភិបាលថយចុះ ១០,២ភាគរយ។
របាយការណ៍ដដែលឱ្យដឹងទៀតថា សមតុល្យគណនីហិរញ្ញវត្ថុ បង្ហាញពីការកើនទ្រព្យអកម្មបរទេសសុទ្ធ ៣៧១,៧លានដុល្លារនៅឆ្នាំ២០២៤ ធៀបនឹងទ្រព្យសកម្មបរទេសសុទ្ធ ៦១៨,៦ លានដុល្លារក្នុងឆ្នាំ២០២៣ ដែលគាំទ្រដោយលំហូរចូលវិនិយោគផ្ទាល់បរទេស ខណៈទ្រព្យសកម្មបរទេសសុទ្ធដែលវិនិយោគផ្នែកផ្សេងទៀត និងវិនិយោគលើផលបត្រមានការកើនឡើង។
ដោយឡែក ទុនបម្រុងអន្តរជាតិ បន្តរក្សាបាននៅកម្រិតខ្ពស់ ដែលឆ្លុះបញ្ចាំងពីភាពរឹងមាំនៃលទ្ធភាពសងបំណុលក្រៅប្រទេស ការរក្សាស្ថិរភាពអត្រាប្តូរប្រាក់ និងប្រព័ន្ធទូទាត់ជាតិ ព្រមទាំងផ្តល់ការការពារគ្រប់គ្រាន់សម្រាប់បំពេញតម្រូវការសន្ទនីយភាពទប់ទល់នឹងវិបត្តិខាងក្រៅ។ ជាក់ស្តែងទុនបម្រុងអន្តរជាតិនៅឆ្នាំ២០២៤ បានកើនដល់ ២២,៥ ប៊ីលាន ដុល្លារ ស្មើនឹង ១២,៦ភាគរយ ធៀបនឹងឆ្នាំ២០២៣ មានចំនួន២០ ប៊ីលានដុល្លារ ដែលស្មើនឹង ៧ខែនៃការនាំចូលទំនិញ និងសេវាគ្រាបន្ទាប់ដែលជាកម្រិតខ្ពស់សម្រាប់ប្រទេសកំពុងអភិវឌ្ឍន៍។ធនាគារជាតិនៃកម្ពុជាបានបង្ហាញនូវមូលហេតុនៃការកើនឡើងនេះ ជាចម្បងបណ្តាលមកពីការកើនឡើងមកពីមកពីកត្តាចំនួនបួន។
ក្នុងនោះ ១.តម្លៃមាស, ២.ការប្រែប្រួលអត្រាប្តូរប្រាក់, ៣.ចំណូលពីការវិនិយោគក្រៅប្រទេស (ការកើនឡើងនៃអត្រាចំណូល និងការធ្វើពិពិធកម្មទ្រព្យសកម្ម) និង ៤.ប្រាក់បម្រុងកាតព្វកិច្ច។ រចនាសម្ព័ន្ធគ្រប់គ្រងទុនបម្រុងអន្តរជាតិ ត្រូវបានរៀបចំឡើងស្របតាមឧត្តមានុវត្តន៍អន្តរជាតិ ដើម្បីធានាការគ្រប់គ្រងប្រកបដោយប្រសិទ្ធភាព និងប្រុងប្រយ័ត្នខ្ពស់សំដៅទទួលបានសុវត្ថិភាព សន្ទនីយភាព និងចំណូលសមស្រប៕ ដោយ៖ មុន្នី MoINFO APP
