តាកែវ៖ ដើម្បីចូលរួមប្រយុទ្ធប្រឆាំងនឹងព័ត៌មានក្លែងក្លាយ មន្ទីរព័ត៌មានខេត្តតាកែវ នៅព្រឹកថ្ងៃអង្គារ៍ ទី១០ ខែមិថុនា ឆ្នាំ២០២៥នេះ បានធ្វើការដង្ហែរក្បួនយុទ្ធនាការ ប្រឆាំងព័ត៌មានក្លែងក្លាយ ក្រោមពាក្យស្លោក «និយាយថាទេចំពោះ-ព័ត៌មានក្លែងក្លាយ-Say No to Fake News» ដោយរៀបចំធ្វើនៅវិទ្យាល័យ ១ឧសភា និងនៅតាមបណ្ដាលផ្សារមួយចំនួនក្នុងស្រុកត្រាំកក់ ព្រមទាំងមានការដង្ហែរក្បួនតាមដងផ្លូវផងដែរ។
លោក អៀម ថៃ ប្រធានមន្ទីរព័ត៌មានខេត្តតាកែវ បានថ្លែងឱ្យដឹង ការធ្វើយុទ្ធនាការនេះ គឺដើម្បីអប់រំដល់ប្រជាពលរដ្ឋ ជាពិសេសយុវជន និងអាជីវករឱ្យយល់ដឹងពីព័ត៌មាន ណាពិតនិងព័ត៌មាន ណាជាព័ត៌មានក្លែងក្លាយ ហើយយើងសង្ឃឹមថា យុទ្ធនាការនេះនឹងបន្តពង្រឹងភាពស៊ាំរបស់ប្រជាពលរដ្ឋប្រឆាំងនឹងព័ត៌មានក្លែងក្លាយ និងរួមចំណែកកសាងសង្គមមួយដែលពោរពេញដោយព័ត៌មានត្រឹមត្រូវ និងមានទំនួលខុសត្រូវ"។
លោក អៀម ថៃ បានបន្ថែមថា យុទ្ធនាការនេះ ធ្វើឡើងមានគោលបំណង បង្កើនការយល់ដឹងដល់សិក្សានុសិស្ស ប្រជាពលរដ្ឋ និងក្រុមអាជីវករ ឲ្យយល់ដឹងពីផលប៉ះពាល់អវិជ្ជមានរបស់ព័ត៌មានក្លែងក្លាយ និងមធ្យោបាយក្នុងការការពារខ្លួនពីព័ត៌មានក្លែងក្លាយទាំងនោះ និងធ្វើឱ្យពួកគាត់ចេះថ្លឹងថ្លែង វិភាគ និងវាយតម្លៃព័ត៌មាន មុននឹងជឿ ឬចែករំលែក ជាពិសេសការផ្ទៀងផ្ទាត់ប្រភព និងភាពត្រឹមត្រូវនៃព័ត៌មាន និង ជំរុញឱ្យសិស្សានុសិស្ស និងអាជីវករក្លាយជាអ្នកប្រើប្រាស់ព័ត៌មានប្រកបដោយការទទួលខុសត្រូវ និងចូលរួមចំណែកក្នុងការទប់ស្កាត់ការរីករាលដាលនៃព័ត៌មានក្លែងក្លាយ។
លោក ទូច ចន្ទី អភិបាលរងស្រុកត្រាំកក់ បានថ្លែងឱ្យដឹងថា ការចុះមកផ្សព្វផ្សាយដល់ប្អូនៗសិក្សានុសិស្ស លោកគ្រូ អ្នកគ្រូ និងអាជ្ញាធរមូលដ្ឋានឲ្យយល់ដឹងពីព័ត៌មានក្លែងក្លាយ នៅពេលនេះពិតជាមានសារៈសំខាន់ណាស់ក្នុងការរួមគ្នាទប់ស្កាត់ និងប្រយុទ្ធប្រឆាំងព័ត៌មានមិនពិត ដែលកំពុងរីករាលដាលយ៉ាងឆាប់រហ័សនៅក្នុងសង្គមបច្ចុប្បន្ន។
លោកអភិបាលរង បានបន្តថា ព័ត៌មានក្លែងក្លាយ អាចបង្កផលប៉ះពាល់យ៉ាងធ្ងន់ធ្ងរដល់សន្តិសុខសង្គម ស្ថិរភាពនយោបាយ និងការអភិវឌ្ឍប្រទេសជាតិ ដូច្នេះគ្រប់ភាគីពាក់ព័ន្ធ ជាពិសេសយុវជន ដែលជាទំពាំងស្នងឫស្សី ត្រូវតែមានការយល់ដឹងស៊ីជម្រៅអំពីរបៀបសម្គាល់ និងផ្ទៀងផ្ទាត់ព័ត៌មានឲ្យបានច្បាស់លាស់ មុននឹងជឿ ឬចែករំលែកបន្ត៕
.j.jpg)
